May mga pagbag-o sa schedule sang voter registration sa talatapan sang Commission on Elections (Comelec).
Sa interview sang Bombo Radyo kay Jonathan Sayno, election assistant II sang Comelec Iloilo City, iya ginpahayag nga magabaton sila sang applications para sa voter registration umpisa Martes tubtub Sabado, lakip na ang holidays, umpisa ‘las 8:00 sa aga tubtub ‘las 5:00 sang hapon.
Suno kay Sayno, para sa disinfection ang adlaw sang Lunes.
Ginahingyo gid ang mga voter applicants nga magsuksok sang face mask kag face shield kag magdala sang kaugalingon nga ballpen.
Sa sulod sang isa ka adlaw, tubtob sa 100 ka tawo ang sarang mabaton sang talatapan sang Comelec sa ibabaw sang Iloilo Terminal Market.
Suno kay Sayno, gina-assess pa subong kun magabutang sila sang offsite venues.
Samtang, yari naman ang calendar of activities nga ginpagwa sang Comelec para sa national and local elections sa Mayo 9, 2022.
Base sa Comelec Resolution No. 10695, ang period sang filing sang certification of candidacies amo ang Oktubre 1-8, 2021 lakip na ang Sabado kag Domingo.
Ang election period ang magaumpisa sa Enero 9 kag magalawig tubtob sa Hunyo 8, 2022.
Sa sini nga time period, ipatuman ang gun ban; buot silingon, ginadumilian ang pagdala ukon pagtransport sang armas luthang ukon anuman nga deadly weapon MAGLUWAS LANG kun otorisado sang Comelec.
Ang campaign period sa national positions (president, vice president, senator kag party-list groups) ang magaumpisa sa Pebrero 8, 2022 tubtob Mayo 7, 2022.
Samtang ang campaign period para sa local positions (House of Representatives member, regional, provincial, city kag municipal officers) ang magaumpisa sa Marso 25, 2022 tubtob Mayo 7, 2022.
Dumilian ang pagpangampanya sa Hwebes Santo kag Byernes Santo nga matuon sa Abril 14 kag 15, 2022.
Suno pa sa Comelec, halin sa Abril 10, 2022 tubtob sa Mayo 9, 2022, pahanugutan ang overseas voters nga makaboto sa Philippine embassies, consulates, kag iban pa nga posts nga “pursuant sa overseas absentee voting system.”
Sa sini nga time period, wala ginapahanugutan ang kampanya sang mga nagapadalagan sa eleksyon.
Ang liquor ban ang magaumpisa naman sa Mayo 8, 2022 tubtob Mayo 9, 2022.
Dumilian ang pagpangampanya sa gab-i antes ang eleksyon ukon sa mismo adlaw sang eleksyon.
