Agud nga madugangan pa ang pwersa sang Pilipinas sa West Philippine Sea, nagpadala ang Philippine Navy sang warship nga BRP Emilio Jacinto sa Palawan.
Ini nga barko ang na-assign sang damlag lang sa Naval Forces West sa Palawan kag ginhatagan sang send-off ceremony sa Captain Salvo Pier, Naval Base Heracleo Alano sa Sangley Point sa Cavite sang Martes, Pebrero 13.
Si Offshore Combat Force Commander Commodore Edward Ike De Sago ang nagpaguna sang seremonya para sa amo nga warship nga nagabug-at sang 712 ka tonelada.
Pahayag sang Navy, pabaskugon pa sang Jacinto ang mga tikang sini agud nga mabantayan ang interes kag teritoryo sang Pilipinas.
Preska man ang 42-anyos nga warship halin sa pulido nga pag-repair, maintenance, kag upgrade.
Padulong ang Jacinto sa West Philippine Sea kun sa diin sunod-sunod ang mga insidente nga naatubang sang Philippine Coast Guard batok sa maritime forces sang China.
Sang 2016, matandaan nga nagdesisyon ang Permanent Court of Arbitration nga wala sang legal nga basehan ang claim sang China sa amo nga teritoryo apang sulit-sulit man ini nga ginabasura sang China kag gintawag pa nga “illegal, null, and void”. #
