Nagpanawagan ang Pilipinas sa militar sang Myanmar nga i-release na si Aung San Suu Kyi, ang democratic leader nga ginpreso kadungan sang pagpatuman sang kudeta sa amo nga pungsod.
Ini ang pahayag nga ginbuy-an ni Foreign Affairs Secretary Teodoro Locsin Jr. sa meeting sang mga Foreign Ministers sa Association of Southeast Asian Nations (ASEAN).
Suno kay Locsin, dapat nga mauntat na ang kinagamo sa Myanmar.
Nagakaapektuhan sini suno sa iya ang iban nga miyembro sang ASEAN gani dapat na nga magbalik sa normal ang dalagan sang state of affairs.
Ginpaanggid pa ni Locsin ang sitwasyon sa daan nga hulubaton sa Pilipinas nga kun nagasakit ang isa ka tudlo, mabatyagan ini sang bilog nga lawas sang tawo.
Ang meeting sang ASEAN foreign ministers ang ginpatigayon agud magpanawagan sang de-escalation sang post-coup political crisis sa Myanmar kag agud nga makaistorya tuhoy sa malinong nga solusyon sa problema.
Tanan nga 10 ka ASEAN foreign ministers ang nagtambong sa meeting lakip na ang military-appointed Foreign Minister sang Myanmar nga si Wunna Maung Lwin.
