Ano ang himuon mo kun nainit ikaw sa isa ka tawo kag gusto mo gid magbalos sa iya ginhimo sa imo?
Kun kis-a, pwede mo nga i-block, i-iunfollow, ukon i-unfriend sa Facebook, ukon pwede man nga indi mo na lang pagbugnuhon forever!
Pero may ara nga tawo nga bangud sa iya kaugot, nagpatindog ini sang balay nga subong makabig na nga record-holder sa bilog nga kalibutan!
Indi ini basta-basta nga balay, bangud ang rason… gusto lang sini nga matabunan ang manami nga view sang iya kasilingan nga iya ginakaugtan!
Didto ini sa Petralia Sottana sa Sicily sa Southern Italy.
Kilala ini nga Casa du Currivu ukon ang ‘House of Spite’ — isa ka pinasahi nga building nga nagauyat sang unofficial title nga pinaka-kitid nga balay sa bilog nga kalibutan.
Duha ini ka panalgan kag yara lamang sa tatlo ka tapak ang iya nga kalapadon nga daw haluson gani makasugat-anay ang duha ka mga tawo kag sigurado nga indi gid maistaran!
Ngaa gintawag ini nga House of Spite?
1950s sang gintukod ini bangud sa away sang magkasilingan.
Indi pa uso sadto ang duha ka panalgan nga mga balay, apang para mahimo ina, kinahanglan nga may pahanugot halin sa tupad-balay. Sa sini nga kaso, wala nagpasugot ang tupad-balay sang tag-iya sang Casa du Currivu gani nagdesisyon na lang siya nga magbalos.
Nagpatukod ini sang second floor apang nag-distansya lang gamay sa iya tupad balay para indi na siya mangayo sang permiso, apang sigurado siya nga kun maglaaw sa bintana ang iya kasilingan, wala ini sang iban nga makit-an kundi ang iya manipis nga balay nga gintukod.
Wala man sang iban nga pulos ang amo nga balay bangud indi man ini maistaran.
Magluwas sa bintana kag hagdan, wala na ini sang sulod… bangud sa liwat, gintukod lang ini agud mag-init ang ulo sang iya tupad balay.
Sa subong, isa ini sa pinakabantog nga building sa Sicily, kag makabig pa nga main-attraction rason sang pagbalik-balik sang mga tawo sa amo nga komunidad sa Petralia Sottana.#