Nagpasalamat ang isa ka opisyal sang Israel sa Filipino workers nga padayon sa paghatag sang serbisyo sa pungsod apisar sa tunga sang pagpang-atake sang militante nga grupo nga Hamas.
Partikular nga gin-mensyonar ni Deputy Mayor of Jerusalem Fleur Hassan-Nahoum ang Pinay nurse nga si Angelyn Aguirre nga nagpamalibad nga bayaan ang iya tigulang nga pasyente apisar may kahigayunan kuntani ini nga makapalagyo kag luwason ang kaugalingon sang nag-atake ang Hamas sa Kibbutz Kfar Aza malapit sa Gaza Strip.
“Despite having a chance to flee the Hamas terror attacks, Angeline showed unbelievable humanity and loyalty by remaining Nira’s side during the violence, resulting in both of them being brutally murdered by Hamas,” pahayag ni Nahoum. Dugang pa sini sa iya post, “Unimaginable honor in the face of evil.”
Si Aguirre, 32-anyos nga tumandok sang Binmaley, Pangasinan, ang isa sa duha ka Pinoy nga una nakumpirma nga napatay bangud sa gamo sa Israel.
Nagaobra ini bilang caregiver sa amo nga pungsod sa sulod na sang pito ka tuig kag nagaplano kuntani nga magpauli sa Pilipinas sa Disyembre kag indi na magbalik sa luwas sang pungsod.
Suno pa sa deputy mayor sang Jerusalem, tuman ka daku ang kontribusyon sang mga Pinoy workers kag mangin ang iya iloy ang ginatatap man sang Filipino nurses.
Ginsiling sini nga tuman ang pag-abi-abi kag pagpalangga sang Israelis sa Filipino community bangud sa ila daku nga dedikasyon sa ila trabaho sa tunga sang gyera.
“For us, it’s as painful to lose one of you as it is to lose one of us,” emosyonal nga pahayag sang opisyal. #
