Sampaw-sampaw nga mga kaso ang ginapangatubang sang isa ka Pinoy sa Florida sa Estados Unidos sang Amerika bangud sa pagbutang sang mga hidden camera sa banyo sang gina-trabahuan sini nga barko agud nga malingling ang mga bisita lakip na ang mga menor de edad.
Ginkilala ang suspek nga si Arvin Joseph Mirasol, 34, cruise worker sa Royal Caribbean kun sa diin ang mayor sini nga trabaho amo ang pagpang-limpyo, pag-ilis sang mga tuwalya, kag paghipid sang mga hiligdaan sa barko nga Symphony of the Seas.
Base sa mga dokumento sa amo nga kaso, nadiskubrehan ang ginpanghimo sang Pinoy sang may isa ka guest nga naglab-ot kuntani sa toilet paper apang nasiplatan sini ang camera nga nakabutang sa counter sa idalom sang sink. Gin-report ini sa customer services, nag-responde ang ship security, kag ginpatigayon ang imbestigasyon.
Base sa criminal complaint, nakit-an sa electronic devices sang Pinoy partikular sa iya nga USB stick ang pila ka videos sang hublas nga mga babayi nga naga-ilis amo man ang video sang child pornography.
Gin-ako ni Mirasol nga siya ang nagbutang sang video camera sa mga banyo sang tion nga nagatrabaho siya bilang attendant halin pa sang Disyembre 2023.
Sa iya nga testimoniya, ginsiling man sini nga gusto sini “kontrolon ang kaugalingon” apang indi sini mahimo rason nga nagbutang man ini sang cameras sa mga kuwarto kun sa diin may mga babayi nga naga-edad 16-anyos pasaka apisar nakahibalo siya nga iligal ang iya ginahimo.
Naka-detain na ini sa Broward County Jail bangud sa mga kaso nga six counts sang video voyeurism, producing child pornography, kag possessing child pornography nga naka-file na sa US District Court of Florida. Natalana ang arraignment sang kaso sa Marso 18.
Nagpaguwa naman sang statement ang Royal Caribbean nga wala nila gina-tolerar ang kaangay nga paminatasan kag magakooperar sila sa himuon nga imbestigasyon sang otoridad.#
(Julien Rambaud / Sipa USA via AP file)
