Naglab-ot sa P170,000 ang multa sa isa ka Pinoy sa Taiwan nga nadakpan sang otoridad nga nagalapas sang quarantine protocol sa sulod lamang sang walo ka segundos.
Santo sa report sang Central News Agency sang gobyerno sang Taiwan, gina-isolate ang amo nga Pinoy sa isa ka hotel sa southern port city sang Kaohsiung.
Nakit-an sa surveillance camera ang iya nga madasig nga paggwa sa iya nga kwarto kag may ginbilin sa gwa sang puertahan sang isa ka kwarto kun sa diin naka-isolate man ang iya nga abyan.
Ang 8 ka sugundos nga breach of protocol ang gilayon nga ginreport sang mga staff sang hotel sa mga pulis.
Suno sa otoridad, paglapas na ini sa mandatory 14-day quarantine sang syudad kun sa diin nahamtang ang hotel.
Nahibaluan nga istrikto ang Taiwan sa 56 ka mga hotel nga ginagamit para sa quarantine.
Ang Taiwan ang may yara sang 716 ka kaso sang COVID-19, pito ang patay, kag isa man ini sa mga lugar sa bug-os nga kalibutan nga ginadayaw bangud sang madasig kag epektibo nga pandemic response.
