Nakuhaan sang masobra P300,000 nga balor sang suspected shabu ang isa ka lalaki nga naga-sideline bilang pintor kag residente sang Barangay San Juan, Molo, Iloilo City.
Ginkilala ang subject nga si alias Laway, 37, may pangalan sa Barangay Anti-Drug Abuse Council (BADAC).
Nakuha sa iya possession ang ginabanta 50 gramos sang ginapasuni iligal nga droga nga nagabalor sang P370,000.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4 kag City Drug Enforcement Unit, iya ginpahayag nga duha ka semana ang ila monitoring antes ginpatigayon ang operasyon.
Suno kay Inot, nakabaton sila sang impormasyon kaangot sa makaduluda nga hulag sa balay sang subject kun sa diin masami may nagakadto nga indi pamilyar nga mga tawo kag nagapalamalhas na kun magguwa.
Magluwas diri, panalagsa lang naga-trabaho bilang pintor si alias Laway kag may pito pa ka kabataan suno kay Inot, apang makatilingala nga madamo ini sang propiedad kag kagamitan.
Dugang sang pulis, may motorsiklo nga nagadul-ong sang suplay sa balay ni alias Laway kag ginaalegar nga halin sa Tigbauan.
Yara ini subong sa custodial facility sang pulis kag natalana nga mag-atubang sang reklamo nga paglapas sa R.A 9165 ukon Comprehensive Dangerous Drugs Act of 2002.
