Nagalaum ang Philippine National Police (PNP) nga i-konsiderar liwat sang mga mamalidha sa Estados Unidos ang amendment nga ginduso agud nga limitahan ang bulig sang US sa mga pulis sa Pilipinas.
Suno kay PNP Spokesperson Police Colonel Jean Fajardo, magahulag ang PNP kag i-address ini nga isyu paagi sa diplomatic channels.
Madumduman nga sang Hulyo 14, naghisugot ang mga mamalidha sa US nga ilakip sa amendment sa National Defense Authorization Act for Fiscal Year 2023 nga untaton ang US assistance sa PNP tubtub nga mahitso na ang problema sa human rights violations sa pungsod kag ma-meet ang human rights requirement.
Suno pa kay Pennsylvania Congresswoman Susan Wild nga amo ang nag-introduce sang amendment, indi nagakabagay nga magkadto ang buwis sang Estados Unidos sa pagsuplay sang armas, training, kag iban pa nga bulig sa state security forces sang Pilipinas nga may yara sang ‘violent’ human rights violations.
Gin-cite sini nga yara sa 30,000 ka extrajudicial killings ang natabo sa Pilipinas halin sang 2016 tubtub subong bangud sang “assassinations, arbitrary arrests, torture, kag red-tagging sa labor organizers kag oppositions leaders”.
Ginpahayag man sini nga nagpanawagan si former President Rodrigo Duterte nga patyon ang “politically engaged bishops” kag ginmuno man sini ang paghingalan sang International Trade Union Confederation sa Pilipinas bilang isa 10 ka mga pungsod sa kalibutan nga “most repressive sa labor movement and workers.”
Suno naman sa PNP spokesperson, isa ka institusyon ang PNP nga advocate kag nagadampig sa tawhanon nga kinamatarong.
Ginpahayag man sini nga wala nakahibalo ang PNP kun ano nga mga partikular nga kaso ang gin-konsiderar kag gintun-an sang US lawmakers sa pagpasar sang amo nga amendment.
Nagpasalig man ini nga nagapakig-angot gid ang PNP sa Department of Justice (DOJ) sa pag-imbestigar batok sa ginapahayag nga human rights violations nga nahimo sa pila ka police operations.
