Ginasigurado sang Police Regional Office VI nga wala ini sang personnel nga nagapakigbahin sa anuman nga aktibidad nga may kaangtanan sa iligal nga droga.
Ini kaangot sa fourth State of the Nation Address ni President Ferdinand Marcos Jr. kun sa diin nahinambit sini nga may mga government personnel nga involved sa illegal drug activities kun sa diin 677 sa mga arestado amo ang naga-serbisyo sa gobyerno lakip ang masobra 100 elected officials kag masobra sa 50 ka mga pulis.
Sa Western Visayas naman suno kay Regional Director Police Brigadier Gen Josefino Ligan, indi lang surprise drug test ang ginahimo kundi patigayunon man ang mandatory drug testing sa tanan nga mga personnel.
Sa record subong suno sa iya, wala pa sang nakit-an nga pulis sa rehiyon nga nagabaligya sang droga ukon nagaprotekta sa mga durugista.
Nagpaandam ini nga pananglitan may yara man, pahalinon ang pulis sa serbisyo pagkatapos nga mag-agi sa due process.
Matandaan nga sa pagsugod gid sang termino ni Ligan bilang director sang kapulisan sa Western Visayas sang Hunyo, ginpangunahan na sini ang random drug testing sa mga commanders sang Police Regional Office-6 sa Camp Delgado agud ma-assess ang intergridad nila bilang mga opisyal kag agud masiguro nga wala gid man sang involved sa illegal drugs.
