Napatay na sa edad nga 78-anyos ang isa ka polio survivor nga si Paul Alexander ukon kilala bilang “the man in the iron lung” bangud sa indi sini kinaandan nga eksperyensya kun sa diin masobra 70 ka tuig ini nga nagkabuhi paagi lamang sa iron lung.
Indi pa maathag kun ano gid ang rason sang iya kamatayon apang sang Pebrero, matandaan nga gindalagan ini sa ospital bangud sa pagpositibo sa COVID-19 nga tuman ka delikado sa iya ikaayong lawas.
Tumandok sang Dallas, Texas si Alexander. Nakaangkon siya sang polio sang 1952 sa edad nga anum ka tuig rason nga naparalisa ini halin sa liog kag sa bug-os sini nga lawas. Sang amo nga tuig, kasagsagan gid sang polio epidemic — masobra 21,000 ka kaso sang paralytic polio ang na-rekord sa United States suno sa US Centers for Disease Control and Prevention.
Bangud sa amo nga balatian, indi makaginhawa sang maayo si Alexander rason nga ginbutang siya sang mga doktor sa metal cylinder nga amo ang nagpalawig sang iya kabuhi sa masobra pito ka dekada.
Ang ventilator — daku nga yellow metal chamber — amo ang naga-require kay Alexander nga ihigda ang lawas sini kag ulo gid lamang ang kit-anon. Ang air pressure ang padayon nga naga-cycle up kag down agud mag-stimulate sang pagginhawa.
Kilala man siya bilang si “Polio Paul” kag nahatagan man sang Guinness World Record sang titulo bilang longest-surviving patient nga nabuhi sa bulig lamang sang nasambit nga makina.
Apisar sang iya nga sitwasyon, wala ini nag-upang kay Alexander nga matuman ang iya handum.
Sa edad nga 21, siya ang labing-una nga tawo nga naka-graduate sa high school sa Dallas nga wala gid nakatambong sang face-to-face nga mga klase. Naka-gradwar man ini sang abogasya sa University of Texas sa Austin, nakapasar sa exam, kag nangin trial lawyer ini nga nagtiglawas sang mga kliyente sa korte suksok ang three-piece suit kag ang modified wheelchair nga amo ang nagasuporta sa iya paralisado nga lawas.
Nakapublish man ini sang libro nga “Three Minutes for a Dog: My Life in an Iron Lung” nga walo ka tuig sini nga nasulat.
Tuman man ang pagpasalamat sang pamilya sini sa tanan nga nagpalangga sa iya, ilabi na ang iya utod nga si Philip Alexander nga amo gid ang nagpabilin sa iya nga tupad tubtub sa iya ulihi nga ginhawa.
“He was just a normal brother to me. We fought, we played, we loved, we partied, we went to concerts together – he was just a normal brother, I never thought about it. He was the master of his domain, helping people to help him,” pahayag ni Philip. “It was an honour to be with him in his last moments.”##
Pic: The Dallas Morning News/AP
