ILOILO – Indi na makasulod sa probinsya sang Iloilo ang swine, swine semen, pork, pork products kag by-products nga nagikan sa Eastern Visayas.
Ini ang santo sa Executive Order No. 048 Series of 2021 nga gin-isyu ni Iloilo Governor Arthur Defensor Jr. subong nga adlaw, Pebrero 13.
Kasunod ini sang kumpirmasyon sang Department of Agriculture nga nakasulod na sa Eastern Visayas, partikular na sa Leyte kag Masbate, ang African Swine Fever ukon ASF.
Sa interview sang Bombo Radyo kay Defensor, iya ginpahayag nga ginpataas lang ang kudal sa Iloilo Province agud indi man maapektuhan ang multi-billion hog industry sang probinsya.
Antes ang Executive Order No. 048 Series of 2021, pork kag pork products pa lang halin sa Luzon, Mindanao, kag iban ang ASF-affected countries ang banned sa probinsya sang Iloilo.
Suno pa kay Defensor, ipaidalom man sa maid-id nga disinfection ang tanan nga livestock transport carriers nga nagasulod kag nagagwa sa Livestock “Oksyon” Market (LOM), Livestock Auction Market (LAM) kag livestock holding facilities.
Ginhingyo man sa mga couriers nga ipaiway anay ang pagbaton kag pagdeliver sang pork products.
Una na ginpahayag sang Department of Agriculture nga magluwas sa mga pantalan, hugot nga ginabantayan ang mga couriers kag online sellers bangud sa posible pagpalusot sang pork kag pork products.
Ginmanduan man mga local govenrment units sa Northern Iloilo nga hugot nga imonitor ang posible pagsulod sang swine, swine semen, pork, pork products kag by-products halin sa Masbate area.
