ILOILO CITY – Kumpirmado nga nagpositibo sa COVID-19 ang pasyente sa isolation ward sang Western Visayas Medical Center nga rason sang pagpatuman sang lockdown sa porsyon sang hospital.
Suno kay Dr. Stephanie Abello, chief pathologist sa nasambit nga hospital, ang nagpositibo nga pasyente amo si Patient no. 360 – 72 anyos nga lalaki sang Igbaras, Iloilo nga wala sang travel history sa iban nga lugar.
Ginpahayag ni Dr. Abello nga Hunyo 25 sang gindala sa nasambit nga hospital ang pasyente bangud sa chest pain, Hulyo 1 sang ginkuhaan sang swab para sa COVID testing kag Hulyo 3 sang nagguwa ang resulta sang RT-PCR test.
Gin-athag ni Dr. Abello nga gilayon nga ginsaylo sa COVID-19 ward sang hospital ang pasyente kag gin-lockdown ang portion sang isolation ward kun sa diin una nga naka-confine ang pasyente.
