ILOILO CITY – Imbitado si President Ferdinand “Bongbong” Marcos Jr. sa Indo-Pacific Command sa Honolulu, Hawaii.
Suno kay Department of Foreign Affairs Undersecretary Charles Jose, ang pagbisita ni Marcos ang magadugang sa kadamulon sang kooperasyon nga ginatinguha-an nga mahimo sang Pilipinas sa mga “like-minded states” agud nga ma-promote sang pungsod ang madugay na nga gina-advocate nga amo ang rules-based order ilabi na sa maritime areas.
Ginkumpirma man niya nga ginbaton sang presidente ang imbitasyon kag yara na sa iya nga schedule.
Nagpamalibad ang opisyal nga maghatag sang kabug-usan nga detalye may kaangtanan sa byahe sang presidente.
Ang pagbisita ni Marcos sa Indo-Pacific Command ang matabo kadungan sang tension sa West Philippine Sea.
Una na nga ginpabutyag sang presidente nga handa ini nga mag-expand sang trilateral engagements sa Japan kag Estados Unidos.
