Nakit-an na kag na-aresto liwat sa Angono, Rizal si Michael Cataroja, ang 25-anyos nga missing nga preso sa New Bilibid Prison (NBP) nga una nga gin-report nga patay na kag amo ang nakit-an nga wala na sang ulo sa sulod sang septic tank sang presuhan.
Suno sa Bureau of Corrections, nagmandu na si Director General Gregorio Catapang Jr. sang imbestigasyon agud mahibaluan kun paano nakaguwa si Cataroja sa Bilibid sa Muntinlupa.
May yara man sang tukuron nga board of inquiry para sa imbestigasyon nga maga-usisa kun sin-o ang responsable sa pagpalagyo sang amo nga inmate.
Matandaan nga ang una nga nag-anunsyo nga nadula si Cataroja amo si anay NBP Superintendent Angie Bautista. Una nga ginpahayag ni Bautista nga si Cataroja ang na-detain sa NBP bangud sa paglapas sa Anti-Fencing Law.
Bangud sa amo nga hitabo, naglab-ot ini sa inquiry sa Kamara kun sa diin ginbuyagyag ni Catapang nga posible nakapalagyo ang amo nga inmate.
Sa Kamara man gin-ako ni Justice Secretary Jesus Crispin ‘Boying’ Remulla nga na-“fake news” lamang siya sang iya una nga gin-anunsyo nga nakit-an ang bangkay ni Cataroja nga wala na sang ulo sa sulod sang septic tank sa Bilibid.
Sang ulihi, nagguwa sa imbestigasyon sang medico legal division sang National Bureau of Investigation (NBI) nga indi iya sang tawo ang tul-an nga nakit-an sa septic tank kundi iya sang manok. #
