ILOILO CITY- Nag- apelar ang Police Regional Office 6 sa Iloilo City Government nga liwat nga ikonsiderar ang pagpatuman sang signal jamming sa tion sang highlights sang Dinagyang Festival 2024.
Ini kasunod sang desisyon sang Iloilo City Government nga indi magpatuman sang signal jamming bangud sa natabo sang nagligad nga tuig kun sa diin nadulaan man sang signal ang pila ka mga banwa sa Iloilo amo man sa Guimaras.
Sa interview sang Bombo Radyo kay Police Brigadier General Sidney Villaflor, director sang Police Regional Office 6, iya ginpahayag nga ginarekomendar nila ang pagpatuman sang signal jamming bilang pagpangaman lang batok sa malain nga mga elemento sa palibot ilabi na nga dako nga event ang Dinagyang.
Suno kay Villaflor,sa pagkamatuod, magapatuman man sila sang signal jamming sa highlights sa Ati- Atihan Festival sa Kalibo, Aklan subong nga semana.
Pahayag niya, sa malip-ot nga oras lamang ang signal jamming apang dako ang mabulig sini agud malikawan ang kriminalidad.
Sa interview naman sang Bombo Radyo kay Mayor Jerry Treñas, iya gin-athag nga indi man ini kontra gid sa signal jamming apang ang indi lamang niya luyag amo nga madalahig ang iban nga banwa nga indi man dapat sakop sang signal jamming.
Suno sa alkalde, wala man sang dapat kabalak-an gid kun seguridad ang pagaistoryahan bangud nalab-ot naman sang syudad ang insurgency free status kag ang kinahanglan lamang amo nga mas hugot nga segurifad ang ipatuman sang kapulisan.
