ILOILO – Nagpasalamat ang Police Regional Office 6 sa publiko sa pagsunod sa mga reminders nga nag-contribute sang kalinong kag katawhay sang Western Visayas sa pagselebrar sang Christmas Eve.
Sa interview sang Bombo Radyo kay PLt.Col. Arnel Solis, Spokesperson sang Police Regional Office 6, iya ginpahayag nga wala sang major incidents nga narekord apang may mga aksidente sa dalanon nga natabo.
Suno kay Solis, magatakop na ang adlaw sang Paskwa apang may mga pumuluyo nga nagabaksyon pa gani kinahanglan siguruhon nga sirado ang balay kun wala sang tawo, nagasiga ang suga sa guwa sang balay kag kun mahimo ipangabay sa kasilingan nga lantaw-lantawon ang balay.
I-obserba man ang BLOWBAGETS pahayag niya nga amo ang isa ka checklist nga dapat sundon sang tanan nga drivers agud masiguro nga yara sila sa maayo nga kondisyon sa pag-drive amo man ang ila mga salakyan kon motorsiklo. Ang blowbagets ang nagatumod sa pag-check sang battery, lights, oil, water, brake, air, gas, engine, tire, kag self.
Dugang sang natungdan, magapadayon ang deployment sang mga kapulisan sa simbahan, terminal kag seaport kag airport tubtob sa Enero 1, 2025 apang indi buot silingon nga mauntat man ang presensya sang kapulisan.
