ILOILO CITY- Napasar na sa second reading ang ginproponer nga ordinansa nga nagatukod sang Tricycle Franchising and Regulatory Board sa City Council.
Sa interview sang Bombo Radyo kay Iloilo City Councilor Rommel Duron, chairman sang Committee on Transportation sa konseho, iya ginpahayag nga ginakinahanglan nga magtukod sang board sa pag-regulate sang mga tricycle agud nga mas mangin organisado ang pagkuha sang franchise, organisado ang ruta sang tricycle sa syudad kag mabuhinan man ang iya nga trabaho bilang chairman sang kumitiba.
Suno kay Duron,sa subong, siya pa ang nagabaton sa pagkuha sang franchise, siya man ang naga-assess kun qualified bala ang magakuha sang franchise kag iban pa.
Ginpahayag niya nga sa tion nga matukod na ang nasambit nga board, may yara na sang maga tuon sa mga nagkalain-lain nga mga complaint batok sa mga tricycle units.
May yara man sang makadtuan ang mga complainants agud mag-akomodar sang ila reklamo.
