Gin-certify ni President Ferdinand “Bongbong” Marcos Jr. nga urgent ang pagpasar sang ginaduso nga P5.768 trillion nga national budget para sa 2024.
Sa sulat nga ginpadala nga sulat kay House Speaker Martin Romualdez nga napetsahan sang Septyembre 20 kag ginbasa sang plenary session, ginpahayag ni Marcos nga kinahanglan ang madasig nga pagpasar sa General Appropriations Bill agud mapabilin nga talunsay ang operasyon sang gobyerno kun matapos na ang tuig 2023 kag agud nga mapadasig man ang paghatag pondo para sa nagkalain-lain nga programa.
Ang certification halin sa presidente ang magapahanugot sa pag-approve sa hagna sa second kag third reading sa sulod lamang sang isa ka adlaw.
Ang ginaduso nga national budget para sa 2024 ang 9.5% nga mas mataas ipaanggid sa P5.268 trillion subong nga 2023.
Ang ginaduso naman nga confidential and intelligence funds sa tanan nga ahensya ang nagdangat sa P10.14 billion lakip na ang P4.5 billion para sa Office of the President (P2.25 billion confidential kag P2.31 billion intelligence fund) kag P500 million para sa Office of the Vice President.
Kaangot diri, nagpasalig ang House committee on appropriations officials nga dasigon ang creation sang budget kag aprubahan ini sa Septyembre 27.
Nahibaluan nga duha na ka adlaw nga nagapatigayon sang budget debates ang Kamara sa plenaryo.
Sa idalom sang schedule nga nakuha halin sa appropriations panel, magalawig ang plenary debates tubtub sa Septyembre 27.
