Mas istrikto pa sa mga pagsulundan sa National Basketball Association ukon NBA ang mga patakaran nga ipatuman sa PBA Bubble sa Clark, Pampanga.
Suno kay Secretary Vince Dizon, presidente sang Bases Conversion and Development Authority (BCDA), “gold standard” ang safety kag health guidelines sang NBA, apang masobra pa diri ang ipatuman hampang sa Pilipinas.
Para sa PBA restart, dapat magsuksok sang face mask ang mga players nga yara nagapungko sa bench.
Indi man pagpahanugutan ang mga pamilya sang players nga magsulod sa bubble sa bisan ano nga bahin sang season.
Indi man mahimo ang pag-high five ukon ano man nga selebrasyon sang hampang.
Suno naman kay PBA commissioner Willie Marcial, kun may maggwa sa bubble, indi na ini pagpahanugutan nga makabalik apisar emergency pa ang rason sang paggwa.
Nahibaluan nga natalana nga magbalik ang Philippine Cup sa Oktubre 11 sa Angeles University Foundation gym.
