Ginpanugyanan sang Presidential Security Group ang tanan nga nakapalapit kag nakaupod ni Presidente Rodrigo Duteterte nga magpaidalom sa COVID-19 rapid test bilang kabahin sang ila nga security measures.
Suno kay Presidential Security Group Commander Col. Jesus Durante, ang regular screening nga ginalakipan sang COVID-19 rapid testing ang ginapatigayon sa tanan nga matag-as nga mga opisyal, Presidential Security Group troopers kag close-in personnel nga kaupod ni Presidente Duterte.
Ang rapid test nga ginapatigayon sang PSG Task Force COVID medical team ang lain man sa polymerase chain reaction test kits nga ginagamit sang Research Institute for Tropical Medicine.
Dugang sang natungdan ang sin-o man nga opisyal nga magpositibo sa nasambit nga virus ang indi na pagtugutan pa nga makasulod sa Malacañang.
Apang gin-athag ni Durante nga subject for confirmation pa sang Research Institute for Tropical Medicine ang resulta sang mga rapid test nga ila nakuha.
Madumduman nga sang gintalikdan lang nga bulan ginpatuman sang Presidential Security Group ang ‘no touch policy’ kay Presidente Duterte bilang kabahin man sang ila nga precautionary measure batok sa paglapta sang COVID-19 apisar nga indi ini aprubado sang presidente.
