Nagpahanumdum ang isa ka public health expert sa publiko subong nga summer season nga likawan gid ang pagpangihi sa mga public pool.
Sa interview sang Bombo Radyo kay Dr. Rodney Labis, provincial health officer I sang Iloilo Province, iya ginpahayag nga ang pagpangihi sa swimming pool ang sarang makatuga sang infection sa iban nga tawo nga nagapaligo man sa amo nga lugar.
Paathag ni Dr. Labis nga ini nga butang ang masami nga nagakatabo sa mga swimming pool nga may poor sanitary kag indi husto ang chlorine content nga sarang makapatay sang kagaw sa ihi sang tawo.
Dugang pa ni Labis nga kun mainum sang tawo ang tubig halin sa swimming pool nga contaminated sang urine, sarang ini magtuga sang sakit sa tiyan kag infection naman sa panit sang tawo.
Nagpanugyan ni Dr. Labis sa publiko nga likawan ang amo nga buluhatun sa mga publiko nga paliguan.
Hugot naman ini nga nagpahanumdom sa tagsa ka tag-iya sang mga resort nga siguraduhon gid nga husto ang chlorine level sang ila mga swiiming pool, agud nga malikawan ang balatian nga sarang matuga sang kagaw.
