ILOILO CITY – Indi magpasaka sang criminal complaint ang Iloilo City Police Station 1 batok sa pulis nga amo ang tag-iya sang pusil nga gingamit sang suspek sa pagluthang-patay sa isa ka Chinese nga negosyante sa dalan Iznart, Iloilo City Proper.
Ang ginatumod nga pulis amo si Police Corporal Val Allan Lisay, miyembro sang Mandirigmang Mang-aawit sang Police Regional Office VI.
Sang damlag lang, napamatud-an sa cross-matching kag ballistic examination nga matuod nga kay Lisay ang 9mm service firearm nga gingamit sang ginhold-up kag ginluthang sang suspek nga si Andy Mahinay alias Hapon ang biktima nga si Willie Sy sang Nobyembre 12.
Sa interview sang Bombo Radyo kay Police Major Marc Ivan Salvo, station commander sang Iloilo City Police Station 1, iya ginpahayag nga magapasa lang sila sang report sa mas mataas nga opisina sa hanay sang Philippine National Police agud mapasakaan sang kaso-administratibo si Lisay.
Paathag ni Salvo, indi mapasakaan sang kaso-kriminal si Lisay bangud wala siya sa Dalan Iznart sang ginhimo ang krimen.
Ikaduha suno kay Salvo, wala sang intensyon si Lisay nga ipagamit sa suspek ang iya nga pusil agud ipapatay sa biktima.
Matandaan nga santo sa una nga alegasyon ni Lisay, ginprenda lang niya ang iya nga government-issued firearm sa suspek nga si Mahinay apang wala siya naglaum nga gamiton ini ni Mahinay sa krimen.
Matandaan man nga una na nagpahayag ang Police Regional Office VI nga kun mapamatud-an ang sala ni Lisay, kaso kriminal ang ipasaka bangud accomplice ukon kahimbon si Lisay sa krimen; kag sa kaso administratibo, ipasaka ang kaso nga malversation of public property kag grave misconduct.
Napaidalom gihapon sa restrictive custody si Lisay.
