Ginpatigayon na ang clean-up operation sang Sabado nga adlaw, Setyembre 13, 2025, sa bahin sang Mandurriao public plaza kun sa diin gina tumpok ang mga basura kag gintunaan sang reklamo sang mga pumuluyo bangud sa hindi maagwantahan nga baho nga nagadapya sa nasambit nga lugar.
Sa interview sang Bombo Radyo kay Fire Officer 1 Peter John dela Cruz, ginpahayag niya nga ang baho nagadangat na sa ila nga opisina, kapin pa kun naga-inulan. Dugang pa niya nga mas maayo nga ma-relocate ang ginatampukan sang basura nga napahamtang mismo sa plaza bangud pampubliko ini nga lugar kag mapa-improve pa ang plaza.
Nagpahayag man sang suhestyon ang residente sa nasambit nga isyu sang baho sa Mandurriao public plaza.
Sa interview sang Bombo Radyo kay Luis Cordero, isa ka residente, ginpahayag niya nga mas maayo nga isaylo ang basurahan bangud kun bisan mag-init ukon mag-ulan, ga baho gid ang dapya sang hangin. Suno sa iya, may mga gaalalagi ukon gahinampang sa plaza kag daw kalain sa pamatsyag nga may malain nga baho, kag kalaw-ay sa impression kag kahuluya sang mga tawo kag nagabisita sa lugar.
Nagapanawagan man ang mga pumuluyo sang tayuyon nga pag-atipan kag pagpanami sang plaza, bangud ini ang isa sa mga lugar nga ginakadtuan sang publiko para sa pagpahuway, paghinampang, kag pagliwa-liwa. Suno sa ila, indi na angay nga magpabilin nga malain ang itsura sang plaza, ilabi na nga madamo ang nagakonsiderar nga amo ini ang pinaka wala na-improve nga plaza sa syudad sang Iloilo.
Ginahingyo nila ang klaro nga plano kag regular nga pagpaninlo para mabalik ang katahum kag katinlo sang lugar.
