Nagpaandam sang World War III ang reelected president sang Russia nga si Vladimir Putin kadungan sang iya victory speech matapos nabulsa ang panibag-o nga termino sa amo nga pungsod.
Namensyonar sini ang amo kadaku nga gyera sang nahambalan ang conflict sa tunga sang Russia kag NATO (North Atlantic Treaty Organization ukon kilala man nga North Atlantic Alliance) — isa ka intergovernmental military alliance sang 32 member states kun sa diin 30 ang European kag duha ang North American.
Una na nga nagpaandam si Putin sang risgo sang nuclear war sa kaiping nga pungsod Ukraine (nga ila gin-atake paagi sa “special military operation” duha ka tuig na ang nakaligad) apang una man sini gin-athag nga wala pa siya sang nakit-an nga pagkinahanglan nga maggamit sang nuclear weapons sa amo nga pungsod.
Sang nagligad nga bulan, nagpahayag si French President Emmanuel Macron (Miyembro sang NATO) nga posible ang deployment sang ground troops sa Ukraine sa puturo. Ini bangud apisar madamo nga Western countries ang nagadistansya sa amo nga isyu, madamo naman sa Eastern Europe ang bukas nga nagapabutyag sang ila suporta.
Sang ginpamangkot naman si Putin kaangot sa sini nga pahayag ni Macron kag sa posibilidad sang conflict sa tunga sang Russia kag NATO, ang sabat sini: “𝘌𝘷𝘦𝘳𝘺𝘵𝘩𝘪𝘯𝘨 𝘪𝘴 𝘱𝘰𝘴𝘴𝘪𝘣𝘭𝘦 𝘪𝘯 𝘵𝘩𝘦 𝘮𝘰𝘥𝘦𝘳𝘯 𝘸𝘰𝘳𝘭𝘥.”
Diri na kag iya ginsal-ot ang World War III: “𝘐𝘵 𝘪𝘴 𝘤𝘭𝘦𝘢𝘳 𝘵𝘰 𝘦𝘷𝘦𝘳𝘺𝘰𝘯𝘦, 𝘵𝘩𝘢𝘵 𝘵𝘩𝘪𝘴 𝘸𝘪𝘭𝘭 𝘣𝘦 𝘰𝘯𝘦 𝘴𝘵𝘦𝘱 𝘢𝘸𝘢𝘺 𝘧𝘳𝘰𝘮 𝘢 𝘧𝘶𝘭𝘭-𝘴𝘤𝘢𝘭𝘦 𝘞𝘰𝘳𝘭𝘥 𝘞𝘢𝘳 𝘛𝘩𝘳𝘦𝘦. 𝘐 𝘵𝘩𝘪𝘯𝘬 𝘩𝘢𝘳𝘥𝘭𝘺 𝘢𝘯𝘺𝘰𝘯𝘦 𝘪𝘴 𝘪𝘯𝘵𝘦𝘳𝘦𝘴𝘵𝘦𝘥 𝘪𝘯 𝘵𝘩𝘪𝘴.”
Ang pagbulsa ni Putin sang ikalima nga termino bilang Russian president paagi sa landslide nga 87% sa boto amo ang pinakadaku nga kadalag-an sa eleksyon sa post-Soviet history sang amo nga pungsod.
Wala ini sang ginpangatubang nga daku nga opposition candidate bangud kontrolado sang Kremlin ang political system, media, kag elections.
Ang amo nga eleksyon ang ginpakamalaot man sang iban nga pungsod — gintawag ini sang Germany nga pseudo-election” samtang gintawag naman ini sang Estados Unidos sang Amerika nga “obviously not free nor fair”.
Ang mga nagpakita naman sang suporta sa Russia kag sa resulta sang eleksyon amo ang China, India, Iran, kag North Korea.#
