Nagapakatig-a ang Kingdom of Jesus Christ founder kag leader kag self-proclaimed “Appointed Son of God” nga si Pastor Apollo Quiboloy nga magtambong sa inquiry sa Senado nga amo ang maga-usisa sa mga alegasyon nga may ginpanghimo ini nga sexual abuse.
Suno kay Quiboloy, sa korte lamang siya maga-atubang sa amo nga mga akusasyon. Gintawag pa sini nga may inhustisya nga nagakatabo sa Senado.
“I will not subject myself to injustices that are done in a cloak of a Senate hearing… I will not subject to any of that, but I will face any of you… I will face you anywhere, anytime in a court of law,” kabahin sang pahayag sini nga nabatina sa audio file nga na-post sa Facebook page nga Buhay Kingdom 2024.
Pahayag pa sini, dapat nga wala na gintugutan nga maka-testify pa sa atubang sang mga senador ang testigo nga si alias Amanda bangud naka-reklamo na ini sa iya sa Davao apang nabasura na ang amo nga kaso.
“‘Yung alias Amanda. ‘Yan po ay nagdemanda na ‘yan, ng ganong din mga allegations at iyan ay sinagot po namin. Sinagot ko at ‘yan ay na-dismiss sa korte ng Davao kaya tumakbo sila sa DOJ. Dismissable po, kahit anong tignin ninyo.”
Sa baylo nga magpakita sa Senado matapos gin-subpoena sang Senate committee on women, nagpanugyan pa si Quiboloy nga buligan na lang sang mga senador ang tag-reklamo nga magdiretso sa korte.
Sa pihak sini, padayon ang paghangkat ni Senate Committee on Women chairperson Risa Hontiveros kay Quiboloy agud nga magkadto ini sa inquiry. Pahayag sang senadora, ang pastor amo ang sentro sang kontrobersiya gani dapat nga siya ang manabat sini. #
