Magahatag ang self-proclaimed Appointed Son of God nga si Pastor Apollo Quiboloy sang P1,000 nga premyo sa sin-o man nga makapakot kun sa diin siya nagapanago.
Ini base sa pinakaulihi nga audio recording nga ginpaguwa sang Kingdom of Jesus Christ leader sa tunga sang panawagan sang Senado kag pila ka mga opisyal nga magpakita na ini kag atubangon ang mga akusasyon nga ginahaboy sa iya.
Sa iya nga audio statement, naghatag pa sang clue si Quiboloy kun sa diin ang iya nga lokasyon:
“Ako’y nakakubli, hindi kalayuan dito. Kuta ko’y puro bato, laksa-laksang pula at itim na langgam, handing ipagtanggol ako sa mga manlulupig na mga tao. Kano man o kalahi ko. Upang aking maitayo ang prinsipyong diwa, karanalan, Kalayaan ng isang marangal na Pilipino na naisilang sa paanan ng matayog sa lahat ng bundok Apo, sulong bayan ko, ipaglaban karapatann sa manlulupig di ka. pasisiil ang mamatay ng dahi sa ‘yo,” kabahin sang iya pahayag.
Ini nga audio statement ang makabig nga sabat sini sa huring-huring nga nakaguwa na ini sa pungsod antes pa man naisyuhan sang Senado sang subpoena agud magtambong sa hearing sang Committee on Women, Children, Family Relations and Gender Equality bangud sa gina-alegar nga human trafficking activity kag pagpang-abuso sa mga bata kag kababainhan.
Matandaan nga mangin si President Ferdinand Marcos, Jr. ang nagpanawagan na kay Quiboloy nga magkadto sa Senate hearing kag magsabat sa sini nga mga alegasyon sa iya.
Una naman nga nagpaandam ang committee chair nga si Senator Risa Hontiveros nga pananglitan indi pa magsipot si Quiboloy sa Marso 5, ipa-contempt niya ini kag ipa-aresto.#
