Ginakabig sang isa ka law expert nga kaangay nga ginhigtan na ni Senator Rodante Marcoleta ang iya kaugalingon kag mabudlayan na ini nga makalikaw sa ginaatubang nga plunder kag indirect bribery complaints bangud sa mga ebidensya batok sa iya.
Kaangot ini sa pagrekomenda sang Office of the Ombudsman nga pagpasaka batok sa iya san plunder kag indirect bribery bangud sa paglapas sa Republic Act No. 7080 (Plunder Law), Presidential Decree No. 46 ukon ang layi nga nagadumili sa mga opisyal sang gobyerno nga magbaton sang regalo ukon pabor, kag Article 211 sang Revised Penal Code para sa indirect bribery.
Sa interview sang Bombo Radyo kay Atty. Noel Palomado, isa ka Bombo Abogado, iya ginpahayag nga mabaskog ang ebidensya nga ginauyatan sang Ombudsman bangud nag-ako mismo si Marcoleta nga nagbaton siya sang kabilugan nga ₱75 milyon nga campaign donations sang 2025.
Suno kay Palomado, maathag nga ginlapas ni Marcoleta ang Presidential Decree No. 46 bangud sa pag-ako nga nagbaton siya sang regalo nga nagalab-ot sa 75 million nga regalo halin kanday Rep. Mike Defensor, Joseph Espiritu kag Aristotle Viray para sa iya nga senatorial bid.
Base sa complaint, ang nasambit nga balor ang wala nadeklarar sa iya nga statement of assets, liabilities, and net worth (SALN) sa Senado as of June 30, 2025.
Sa baylo, gindeklara lamang ni Marcoleta ang P39.6 million sa iya nga SALN, nga suno sa iya, na-acquire niya humalin sang 1992 tubtob June 30, 2025.
