Gin-anunsyo sang National Commission on Muslim Filipinos (NCMF) nga maga-umpisa buwas, Pebrero 19, ang balaan nga bulan sang Ramadan.
Ini matapos nga wala sang crescent moon nga nakit-an kagab-i sa Bangsamoro region kag sa Manila Bay, General Santos City, kag sa mga probinsya sang Sultan Kudarat, Sarangani, kag Sulu.
Ang pagbantay sa bulan ang gin-updan man sang Bangsamoro Autonomous Region in Muslim Mindanao (BARMM) Darul Ifta, nagkalain-lain nga Ulama groups, kag Philippine Atmospheric Geophysical and Astronomical Services Administration (PAGASA).
“As such, it is hereby officially declared that the Ramadhan 1447 Hijrah will commence on Thursday, February 19, 2026,” suno sa NCMF.
Nahibaluan nga ang moon sighting ukon hilal sighting amo ang nagamarka sang bag-o nga Islamic lunar month.
Ang Ramadan amo ang pinakabalaan nga bulan sa Islamic calendar kun sa diin nagapuasa ang mga Muslim halin sa kaagahon tubtub sa kasisidmon, kag nagahalad sang pagpangamuyo santo sa ginatudlo sa Islam.
Nagpalab-ot naman sang panamyaw ang secretary sang NCMF nga si Sabuddin Abdruhim para sa Filipino Muslims sa sini nga balaan nga tion.
“We extend our warmest and most inclusive greetings as we welcome this blessed month of Ramadan. This sacred time reminds us that faith is strengthened through patience, compassion, and sincere devotion,” suno kay Abdurahim.
Dugang sini: “May this divine promise inspire us to renew our hearts, uplift one another, and walk together in mercy, unity, and peace.”
 nga maga-umpisa buwas, Pebrero 19, ang balaan nga bulan sang Ramadan.){kind=link}