Gin-anunsyo sang Bangsamoro Darul-Ifta’ nga opisyal nga magasugod ang Ramadan sa Pilipinas buwas, Marso 12, matapos nga wala man gihapon nakit-an ang bulan kagab-i, Marso 10.
Ini nga impormasyon ang ginpahibalo man sang National Commission on Muslim Filipinos (NCMF)— labing una nga tion nga nagdunganay sila kag ang Bangsamoro Autonomous Region in Muslim Mindanao Darul Ifta sa pag-anunsyo sang kaangay nga petsa sa Ramadan.
Nahibaluan nga kada tuig ginapatigayon ini nga moon sighting activities agud una nga makit-an ang crescent moon. Subong nga tuig, ginpatigayon ang moon sighting sa Cotabato City, Maguindanao del Norte, kag mga probinsya sang Basilan, Sulu, Tawi-Tawi, kag Iligan City.
Kun makit-an na ini, ini man ang pagsugod sang Ramadan nga amo ang holy month para sa Muslims.
Ang Ramadan amo ang ikasiyam nga bulan sa Islamic calendar kag isa ka bulan ini nga balaan para sa Muslims sa bilog nga kalibutan agud nga mag-reflect, magpangamuyo, kag mag-puasa bilang spiritual discipline kag pagpalig-on pa sa ila nga pagtuo.
Ang mga nagapati sa Islamic faith ang naga-exercise gid sang obligatory fasting nga isa sa lima ka pillars sa amo nga relihiyon.
Ang exemptions naman amo ang mga physically ukon mentally ill, pregnant kag breastfeeding women, kag mga tigulang bangud maapektuhan sang pagpuasa ang ila nga ikaayong lawas.
Sa sini nga bulan, ginalikawan man sang mga Muslim ang pagpanigarilyo kag pagpakighilawas.
Ang kaiping nga mga pungsod sang Pilipinas sa Southeast Asia nga Singapore kag Malaysia ang magasugod man sang Ramadan buwas nga adlaw.#
