Nagdangat sa P141 million nga cash assistance ang natigayon nga nahatag sang Department of Social Welfare and Development (DSWD) para sa indigent students antes ang pagbukas sang klase subong nga Agosto 22.
Ini nga data ang sandig sa Facebook post ni DSWD Undersecretary Jerico Javier.
Kaagahon sang Domingo, ginpahayag sini nga P141,049,500 nga educational aid ang napaguwa sang DSWD sa 48,033 beneficiaries.
Sa tanan nga rehiyon, ang Western Visayas ang may pinakamataas nga kantidad nga napanagtag bangud diri man sa rehiyon ang may pinaka-madamo nga recipients.
May P20,760,000 disbursed aid sa Rehiyon 6 nga ginhatag sa 5,144 recipients; ginasundan sang Ilocos Region nga may P20,422,000 para sa 5,715 beneficiaries; kag sang Calabarzon nga may P14,292,000 para sa 5,019 beneficiaries.
Sabado sang una nga ginpanagtag sang DSWD ang nasambit nga educational assistance.
Ang masunod nga mga schedule amo ang Agusto 27, Septyembre 3, Septyembre 10, Septyembre 17, kag Septyembre 24 — lunsay Sabado nga adlaw.
‘INDI NA PWEDE ANG MYEMBRO SANG 4Ps’
Suno kay Social Welfare Secretary Erwin Tulfo, indi na eligible para sa sini nga educational assistance ang mga estudyante nga benepisyaryo na nga daan sang Pantawid Pamilyang Pilipino Program (4Ps).
Indi man eligible ang tanan nga government scholars.
Gin-athag man ni Tulfo nga kun nakabaton ang 4Ps beneficiaries sang educational assistance nga ginpanagtag sang DSWD sang Sabado, dapat ini nga ibalik.
I-refund ini suno kay Tulfo paagi sa pagbuhin sa mabaton nga ayuda sa masunod nga bulan. ##
