ILOILO CITY- Ginrekomendar sang Department of Health Region 6 sa Sangguniang Panlalawigan nga i-reactivate ang Regional Hearing Committee sa pag-imbestigar sang internal problem sa Western Visayas Sanitarium and General Hospital.
Ini ang resulta sang committee hearing nga ginpatigayon sang Committee on Health sang Sangguniang Panlalawigan kasunod sang mga reklamo sang pila ka mga contract of service personnel sang ospital sa delayed nga sweldohanay.
Sa interview sang Bombo Radyo kay Iloilo 2nd District Board Member June Mondejar, vice chairman sang nasambit nga komitiba, iya ginpahayag nga tun-an anay sang Provincial Board ang rekomendasyon.
Apang kumporme man si Board Member Mondejar sa pagpaathag sang mga opisyal sang Western Visayas Sanitarium and General Hospital nga nagtambong sa committee hearing sa diin gin-ako sang mga ini nga nagakadelay gid man ang sweldo sang mga contract of service personnel bangud sa ginatumod nga internal conflict.
Indi pa mapat-od sang nasambit nga board member kun may yara pa sang ika-duha nga hugnat sang committee hearing upod ang mga ginareklamo nga sanday Mr. Conrad Sorongon,accountant, kag Ms. Gerville Guartero,ang budget officer.
