ILOILO CITY- Aprubado na ni Iloilo City Mayor Jerry Treñas ang rekomendasyon sang City Disaster Risk Reduction and Management Council nga ipaidalum sa state of Calamity ang syudad sang Iloilo bangud sa water shortage dala sang El Niño phenomenon.
Sa interview sang Bombo Radyo kay Engr. Neil Ravena, head sang General Services Office, iya ginpahayag nga 25 na ka barangay sa syudad ang tuman nga apektado.
Suno kay Ravena, masobra na sa 20,000 ka indibidwal ang apektado sang water shortage kag magasaka pa ini sa masunod nga bulan.
Labing apektado ang mga barangays sa City Proper, Arevalo kag Mandurriao.
Dugang ni Ravena, 17% na sang populasyon sang siyudad ang apektado kag mas mataas ini sa 15% nga parameter sa pagdeklarar sang state of calamity sa isa ka lugar.
Nakipagsapol naman si Mayor Treñas sa City Disaster Risk Reduction and Management Council agod istoryahan ang husto nga tikang sa pagdeklarar sang state of Calamity.
Ginalauman naman ang City Council nga magtalakay kag mag-adopt sang deklarasyon sang state of calamity sa ila legislative session sa pinakamadali nga tion.
