Ginkuwestyon ni Uswag Ilonggo Party-list Representative Jojo Ang ang hurisdiksyon sang Sandiganbayan sa duha sa 14 ka kaso sang graft nga ginpasaka batok sa iya.
Gin-indict sang state prosecutors si Ang sa ginaalegar nga paglapas sa Anti-Graft and Corrupt Practices Act matapos gin-alegar nga may yara siya sang pinansyal nga interes sa construction firm nga nakabaton sang mga kontrata sang gobyerno samtang nagaserbe siya bilang kongresista.
Paagi sa iya abogado nga si Luis Veracruz, nag-file si Ang sang mosyon sa Sandiganbayan agud ipabasura ang duha ka kaso, bangud suno sa iya wala sang hurisdiksyon ang korte.
Ginpahayag kampo ni Ang nga wala ginbutang sang state prosecutors nga may damage sa gobyerno sa case information nga gin-file batok kay Ang.
Ginbase niya ini sa Republic Act 10660 nga nagasiling nga kun wala sang alegasyon sang damage sa gobyerno ukon wala sang bribery, ang kaso dapat nga ipaidalom sa trial sa idalom sang Regional Trial Court.
Base sa korte, ang duha ka proyekto nga nalakip sa ginatumod nga kaso ang may balor nga P3.4-million kag P17-million.
Suno sa abogado ni Ang, ang P3.4-million nga ginpatuhoy sa kaso amo lamang ang bili sang proyekto kag indi ebidensya sang damage sa gobyerno.
Ginpabutyag man niya nga wala sang alegasyon nga wala natapos ang proyekto, ghost project ini, ukon substandard ang paghimo sini.
Ginsiling naman ni prosecutor Ma. Christina Marralag-Batacan nga gin-identify sa case information ang P3.4 million kag P17 million bilang balor sang damage sa gobyerno.
Suno naman kay Associate Justice Edgardo Caldona nga amo ang nag-preside sa proceedings, wala sa case information ang allegation of damage. Nagdugang siya nga kinahanglan anay magkonsulta ang korte kay Presiding Justice Geraldine Faith Econg nga amo ang chair sang Second Division antes magdesisyon sa mosyon.
Bangud sang pending nga motion to quash, gin-reset sang korte ang arraignment ni Ang sa Setyembre 8.
Samtang, nag-file man ang abogado ni Ang sang separado nga mosyon agud mapatigayon ang tanan nga 14 ka graft cases sa isa lamang ka division sang Sandiganbayan.
Matandaan nga suno sa mga piskal, may interes si Ang sa isa ka construction firm nga nakabaton sang 214 milyon pesos nga balor sang mga kontrata sa Department of Public Works and Highways (DPWH) samtang nagapungko siya bilang party-list representative.
