ILOILO CITY- Nagdepensa si Cagayan 3rd District Rep. Joseph “Jojo” Lara may kaangtanan sa iya proposal nga magapatigayon sang House inquiry sa ginaalegar pagdagsa sang mga Chinese students sa mga eskwelahan sa iya probinsya sa tunga sang nagainit nga tensyon sang Pilipinas kag China sa West Philippine Sea.
Ginpanginwala ni Lara ang mga obserbasyon nga ang tikang niya ang makabig nga Sinophobia ukon Anti- Chinese, kag racism ukon diskriminasyon sa Chinese.
Suno sa iya, wala sang basehan ang amo nga obserbasyon bangud ang intensyon lamang niya amo nga mapaimbestigaran lang ang pagdamo sang international foreign students nga natabuan man nga mga Chinese students ang mga ini.
Ginpaathag sang mamalidha nga ang iya proposal ang naangot sa report sang Cagayan University sang October 2023 nga kapin 4,600 Chinese students ang nakatapos ukon naka-enrol sa ila eskwelahan.
Apang, napaslawan ang unibersidad nga magpadala sang tiglawas sa compliance meeting nga ginpatawag ni Lara agud matumod ang mga pangalan kag iban nga impormasyon tuhoy sa mga Chinese students.
Ang House Resolution 1666 ni Lara ang pending sa first reading sa kamara.
Sang nagligad nga semana, ginpahayag sang Bureau of Immigration nga ginabanta nga 1,500 Chinese nationals ang nakabaton sang student visas halin sa ahensya sang 2023, matapos sila nga gin- endorso sang lehitimo nga unibersidad sa Cagayan, kag gindugang nga sila ang legal nga ginproseso kag may kompleto nga dokumento.
