Maga-file sang resolution ang Ilonggo lawmaker nga si Rep. Raoul Danniel Manuel sang Kabataan Partylist agud nga makapatigayon sang inquiry ang Kamara sa kontrobersyal nga P680-million Ungka flyover.
Kaina sang aga sang nagpatigayon si Manuel sang ocular visit sa flyover kag may yara man sang public consultation kaupod sa mga driver, commuters, kag mga residente nga nagapuyo malapit sa project.
Lakip sa nagapanguna nga problema nga ginpalab-ot sa kongresista amo ang nagapugok nga trapiko nga wala pa sang kaathagan kun san-o matapos. May yara man sang mga pumuluyo nga naga-reklamo nga wala pa nabayaran sang Department of Public Works and Highways (DPWH) matapos nadalahig ang ila nga balay kag propiedad sa ginpang-guba agud maghatag ligwa sa proyekto.
Suno kay Manuel, mangin siya ang naka-eksperyensya man sang “pagbalod-balod” nga gina-reklamo sang mga motorista sang nakaagi siya sa amo nga flyover sang temporaryo ini nga ginbuksan sa publiko sang nagligad nga tuig.
Kanugon sang minilyon nga kuwarta sang gobyerno suno kay Manuel para sa sini nga proyekto kag mahimo pa kuntani ini magamit sa iban nga mapuslanon nga mga proyekto kaangay sang classrooms.
“Kongresista kita sang mga pamatan-on kag ang mga kabataan indi man pwede nga maghipos lang. Dapat gid ina ya nga may obrahon kita,” suno sa Ilonggo representative.
Nagalaum man si Manuel nga sa iya pag-file sang resolution para sa house inquiry, makatipon siya sang suporta gikan sa iban nga mga mamalidha.
Matandaan nga sang Disyembre 2022, nagpasar sang resolution ang municipal council sang Pavia, Iloilo agud magpanawagan sang House inquiry sa Ungka II flyover nga isa sa last pet projects ni former Sen. Franklin Drilon antes ini nag-retiro sa pulitika sang nagligad nga tuig.
Gin-siraduhan sa vehicular traffic ang flyover halin sang Septyembre 18 kag amo ang ginatudlo rason sang paglala sang traffic congestion ilabi na sa peak hours sa aga kag gab-i.
Ini nga flyover ang gina-construct sang Iloilo-based contractor nga International Builders Corp. (IBC).
Ang resolution sang Pavia Municipal Council ang ginpadala man anay kanday Iloilo Reps. Janette Loreto-Garin, Michael Gorriceta, Lorenz Defensor, Ferj Biron, Raul Tupas, Julienne “Jamjam” Baronda, Jojo Ang sang USWAG partylist, kag Lex Anthony Colada sang AAMBIS-OWA partylist. ##
