Ginpanginwala ni Armed Forces of the Philippines (AFP) Chief of Staff General Romeo Brawner Jr. ang isa ka report halin sa Japan nga nagpangindi ang Pilipinas nga mag-upod sa natalana kuntani nga multilateral naval exercise sa West Philippine Sea kun sa diin yara ang United States, Japan, kag Australia.
Sa amo nga report nga ginpagwa sang Agusto 18, ginpahayag nga magapadala ang tatlo ka pungsod sang ila tagsa ka barko sa Pilipinas para sa naval exercise, apang nag-kansela ang Pilipinas bangud tuman ka daku ang aircraft sang tatlo ka mga pungsod kag indi sarang makahugpa sa decks sang warships sang Pilipinas.
Apang suno kay Brawner, indi matuod nga may naka-schedule nga naval exercises sa palibot sang ginaagawan nga teritoryo.
Wala man sang hinalung-ong suno sa iya ang tatlo ka pungsod kun sin-o ang source sa amo nga nauna nga report.
Gin-athag man ni Brawner nga pananglitan may yara sang military exercises, handa ang AFP nga suportahan ini kun kaupod sa mga nasyon nga may kaangay nga kawsa sa Pilipinas. #
