Nanindugan si retired judge kag Philippine Charity Sweepstakes Office (PCSO) Chairperson Felix Reyes nga wala siya sang labot sa mga isyu nga ginapangatubang niya subong, nga ginbuyagyag sang missing sabungero whistleblower nga si Alyas Totoy ukon Julie “Dondon” Patidongan.
Sa isa ka opisyal nga pahayag nga ginpagwa subong nga adlaw, ginpabutyag ni Reyes nga wala sang kamatuoran ang mga akusasyon ni Patidongan kag handa siya mag-cooperate sa bisan ano nga imbestigasyon nga pagahimoon sang gobyerno para sa isyu.
Una nga gin-alegar ni Patidongan nga ang retirado nga judge may koneksyon sa case-fixing nga ginapaboran ang negosyante nga si Atong Ang.
Suno pa sa iya, may mga international trip sila nga gin-updan sang mga piskal kag mga kaupod sini nga gin-alegar nga parte sang nasambit nga iligal nga aktibidad.
Apang ginpanginwala ni Reyes ang tanan nga alegasyon kag ginpahayag nga ini tanan kabahin sang kabutigan.
Bilang kabahin sang iya kooperasyon, ginpa-otorisar man ni Reyes ang Bureau of Immigration nga buksan ang tanan niya nga travel records halin sang siya nagretiro sa judiciary sang tuig 2021.
