Mangin international na ang reunion concert sang banda nga Rivermaya kag magasugod na ini sa Septyembre!
Gin-anunsyo ini sang OPM band drummer nga si Mark Escueta sa Instagram apang wala pa sang napaguwa nga dugang nga mga detalye.
“#RivermayaTheReunionGlobalTour kicks off this September 2024,” caption ni Mark.
Naka-set ang concert para sa United States kag Canada subong nga tuig amo man sa Middle East, Singapore, Australia, kag London.
Ginahulat pa sang fans ang eksakto nga petsa kag venues sa amo nga events.
Sang Pebrero, matandaan nga gin-treat nanday Mark, Rico Blanco, Bamboo Mañalac, kag Nathan Azarcon ang OPM fans paagi sa ila reunion concert sa SMDC Concert Grounds sa Paranaque City.
Kilala sila sa hit songs nga “214,” “Kisapmata,” “Elesi,” “Himala”, “Hinahanap-hanap Kita”, “Awit ng Kabataan” kag madamo pa.
Natukod ang banda sang 1994 kag isa sa ginakabig nga legends sa OPM bangud sa ila chart-topping songs kag timeless hits.
Una nga naghalin si Perf De Castro kag ginsundan nanday Mañalac kag Blanco nga nagsulod sa solo music careers sang 1998 kag 2007. Nagpabilin naman sanday Escueta kag Azarcon sa Rivermaya kag sunod nga nagsulod sanday Mike Elgar kag Aiman Borres.
