Gin-adoptar sang Senado ang resolution nga ginduso agud nga kilalahon ang power couple nga sanday Marian Rivera kag Dingdong Dantes bangud sa ila pag-serbe nga inspirasyon ilabi na sa ila nga ulihi nga pelikula nga “Rewind”.
Si Senator Robin Padilla, isa man ka action star, amo ang author sang Senate Resolution 909.
“Sila po ang simbolo ng makabagong pamilyang Pilipino – may pag-ibig sa Diyos, sa bayan, sa kalikasan at sa kapwa-tao kung kaya nararapat lamang po ang ating pagkilala sa kanila sa hapong ito,” kabahin sang speech ni Padilla.
Sa atubang sang celebrity couple nga yara gid mismo sa Senado agud batunon ang kopya sang resolution, ginpasidunggan man si Director Mae Cruz-Alviar.
Matandaan nga opisyal na nga naagaw sang Rewind ang korona sang “Hello, Love, Goodbye” nanday Kathryn Bernardo kag Alden Richards bilang highest grossing Filipino film of all time.
Natabo ini sang Enero 26 sang nagdangat na sa P889 million ang kabug-usan nga worldwide gross sang amo nga pelikula nga entry sa 49th Metro Manila Film Festival.
Mas mataas ini sa P880-million nga income sang “Hello, Love, Goodbye” sang 2019.
Napaguwa ang ‘Rewind’ sa masobra 270 ka mga sinehan sa Pilipinas, United Arab Emirates, United States, Canada, Australia, New Zealand, Singapore, Guam, kag Saipan.#
