ILOILO CITY- Gintuad sang isa sa mga testigo sa pagpatay sa tigulang nga care-taker sa Cabugao Norte, Sta. Barbara, Iloilo nga may nakit-an siya nga makaduluda nga mga tawo nga nagapanilag sa lugar antes natabo ang pagluthang patay sa 72-anyos nga si Jilcito Bacanto.
Sa interview sang Bombo Radyo kay alyas Rene, iya ginpahayag nga kahapon palang, may natalupangdan na siya nga duha ka indi pamilyar nga mga lalaki nga nagalibot sa lugar kag sakay sa motorsiklo kag may dala nga pusil nga kaangay nga may ginabantayan.
Kaina, antes gintiro ang biktima, nakit-an niya liwat ang duha ka mga lalaki nga sakay sa Bajaj nga motorsiklo nga duag blue.
Sa iya paglaragway, ang gunman nga nagaangkas sa motorsiklo ang ginabanta nagaedad sang 55-anyos, samtang ang driver naman ang mas bataon ang edad.
Suno sa testigo, nagpalagyo padulong sa direksyon sang Leganes ang mga riding in tandem suspects pagkatapos sang insidente.
