ILOILO CITY – Nagpasalig ang bag-o nga director sang Iloilo City Police Office nga tutukan sang iya administrasyon ang paglagas sa mga motorcycle-riding suspects sa syudad sang Iloilo nga wala lang nagapangluthang-patay kundi nagapangawat man kag nagahimo sang iban pa nga krimen.
Sa interview sang Bombo Radyo kay Police Colonel Uldarico Garbanzos, iya ginpahayag nga mas epektibo nga estratehiya ang iya nga gamiton nga amo ang ginatawag nga Quad concept.
Ang quad staff sang isa ka police unit ang ginabug-usan sang intelligence, operations, police-community relations, kag investigation.
Bangud sang nagadamo nga kaso sang pagpamatay kun sa diin ginatudlo responsable amo ang riding-in-tandem suspects, nagpahayag si Garbanzos nga nagpangayo na sila sang bulig sa Criminal Investigation and Detection Group (CIDG) kag iban pa nga intelligence units agud masolbar ang mga kaso.
Agud malikawan ang dugang nga mga kaso, patigayunon ang intelligence operation, operational alignment, intelligence-driven placement sang checkpoints, Oplan Sita kag Oplan Bakal, kag iban pa.
Sa pagtapna kag paglikaw sa krimen, pulis lang ang manguna suno kay Garbanzos apang kinahanglan gihapon ang suporta sang komunidad.
Si Garbanzos ang nagpungko bulos kay Police Colonel Eric Dampal nga nangin ICPO chief halin sang Pebrero 20, 2020.
