ILOILO CITY- Nagpaathag ang pamunuan sang Iloilo City Traffic Management Unit kasunod sang reklamo sang mga motorista kagab-i bangud sa ginpatuman nga road closure sa pila ka areas sang syudad apisar wala sang abiso sa mga motorista.
Sa interview sang Bombo Radyo kay Retired Police Colonel Uldarico Garbanzos, iya ginpahayag nga wala na sila nakapagwa sang advisory paagi sa pag-post kuntani sa ila facebook page bangud nga malip-ot man lang ang oras sang closure nga para kuntani sa mga tribu nga nagapatigayon sang blocking sa judging areas.
Suno kay Garbanzos, sang ginpatuman ang road closure kagab-i, malaka na man lang ang mga salakyan.
Nahibaluan nga pila sa dalan nga apektado sang road closure kagab-i amo ang corner Mabini-Delgado, Quezon- Delgado, kag Quezon- Ledesma streets.
Matandaan nga indi ini ang una nga bes nga may yara sang road closure apang wala sang advisory nga napagwa ang amo nga opisina.
Sang Disyembre 21, nagwangal man ang mga motorista nga nagalabay sa Muelle Loney Area bangud ginpasirado ini agud hatagan ligwa ang ginpatigayon nga gift giving activity sa Iloilo Freedom Grandstand nga nagresulta sang paggutok sang trapiko.
Wala sang advisory nga nabalhag sa official Facebook Page sang unit antes ang effectivity sang road closure, apang depensa ni Garbanzos, naka-post sila sang advisory apang posible nga wala nag-pop-up gani wala man makit-an sang mga netizens.
