Pananglitan arestuhon si former Philippine National Police (PNP) chief kag subong Senator Ronald “Bato” dela Rosa kasunod sang mangin resulta sang imbestigasyon sang International Criminal Court (ICC), maga-upod sa presuhan si Senator Robin Padilla.
Suno kay Padilla, updan niya si Senator dela Rosa bangud isa man siya sa nag-suporta sa drug war. Ang kontrobersyal nga drug war sang tion ni former President Rodrigo Duterte amo ang ginabusisi sang ICC bangud sang ginpahayag natabo nga extra-judicial killings.
“Kung huhulihin nila si Bato isama niyo na ako dahil ako isa ako sa sumuporta kay Pangulong Rodrigo Roa Duterte diyan sa drug war… Walang iwanan nga e. Sasamahan ko sila kung saan sila, tutal sanay naman tayo sa kulungan. Sa abroad pa, naku masarap pagkain doon. Okay ‘yon,” suno kay Senator Padilla nga isa man anay ka person deprived of liberty.
Antes sini, ginpahayag naman ni Senator Francis Tolentino nga siya ang magapungko nga legal counsel ni dela Rosa sa tanan nga ICC proceedings.
Sanday Padilla, Tolentino, kag Dela Rosa ang lunsay mga myembro sang PDP-Laban faction kun sa diin chairman si former President Duterte. ##
