Ginpatawag sang Sandiganbayan Third Division si anay House Speaker Martin Romualdez nga mag-atubang sa korte bwas, Septyembre 10, para sa hearing sa iya motion nga magpadayon ang iya hospital confinement.
Suno sa order, ginamanduan si Romualdez nga mag-atubang sa korte kon tugutan sang iya kondisyon sa lawas.
Ginpaathag man sang anti-graft court nga yara na sa ila ang kustodiya kay Romualdez kag ang Sandiganbayan lamang ang may awtoridad nga magtumod kon ang iya medical condition makaapekto sa implementasyon sang arrest warrant, sa pagpadayon sang iya pagpa-confine sa ospital, ukon sa pagdala sa iya sa detention facility.
Nagpagwa man ang Third Division sang subpoenas ad testificandum para sa mga doktor ni Romualdez nga sanday Rody Sy, Rogelio Libarres, Kurt Allen Sibayan kag Rosalio Torres.
Nahibaluan nga ginbalik sang Philippine National Police (PNP) kahapon ang arrest warrant ni Romualdez para sa kaso nga plunder matapos nga wala ini magpakita sa korte bangod nag-file sang urgent motion para sa pagpadayon sang iya hospital confinement.
Ginserbe sang kapulisan ang arrest warrant kay Romualdez kag gin-agi man ini sa booking procedures samtang yara sa hospital confinement.
Sa iya motion, ginsiling ni Romualdez nga nag-antos siya sa Type 2 diabetes, hypertension, primary hypothyroidism kag iban pa nga mga balatian.
Ang arrest warrant batok kay Romualdez, anay Ako Bicol Representative Zaldy Co kag duha pa ka akusado ang ginpagwa sang Sandiganbayan Third Division pila lamang ka oras matapos nga nag-file ang Office of the Ombudsman sang formal charges batok sa ila.
Base sa information nga gin-file sang mga prosecutor sa anti-graft court, gina-akusaran sanday Romualdez kag Co sang alegasyon nga sa indi magnubo sa 15 ka tion, direkta ukon indi direkta nga nagbaton sang commissions, shares, percentages, kickbacks, commitments kag iban pa nga financial benefits nga nagabalor sang indi magnubo sa P7.44 billion.
Suno sa formal charges, gina-alegar nga ang kwarta naghalin sa mga contractor, persona kag mga entity nga may interes sa flood control, infrastructure kag iban pa nga proyekto sang gobyerno nga ginpondohan sa idalom sang General Appropriations Acts para sa fiscal years 2022 tubtob 2025.
Samtang, paagi sa iya abogado nga si Ade Fajardo, ginsiling ni Romualdez nga ginatahod niya ang legal process kag atubangon niya ang mga alegasyon batok sa iya suno sa kasuguan.#
