Ginkumpirma sang abogado sang actress nga si Rufa Mae Quinto nga may yara ini sang standing warrant of arrest.
Suno kay Atty. Mary Louise Reyes, nagapangatubang si Rufa Mae sang kaso nga kaangot man sa isyu sang Dermacare nga amo man ang kumpaniya nga involved kun ngaa gindakop man ang actress-entrepreneur nga si Neri Naig nga asawa ni Chito Miranda.
Kaangay kay Neri, nangin celebrity endorser man ang 46-anyos nga komedyante sang Dermacare nga subong kontrobersyal bangud sa investment scam.
Suno sa legal counsel ni Quinto, 14 counts sang paglapas sa Section 8 sang Securities Regulation Code ang iya ginapangatubang.
Sa layi nga ini nakasaad nga ang securities kaangay sang shares kag investments ang indi mahimo mabaligya sa Pilipinas nga wala sang registration statement nga duly filed sa/kag naaprubahan sang SEC.
Apang sa statement sang abogado, ginklaro nga wala sang large-scale estafa complaint nga gin-file batok kay Rufa.
Maga-surrender ini sa otoridad kag magapyansa suno kay Reyes. Sa subong, yara pa ang aktres sa Estados Unidos sang Amerika.
“She will face those charges… mag-voluntary surrender siya and magpo-post po kami ng bail for that. She’s worried kasi hindi naman totoo ‘yung allegations kasi my client po is just a brand ambassador, a model-endorser,” pahayag sang legal counsel.
“Ni hindi sa kanya nakapagbayad ng downpayment, tapos ‘yung mga tseke po puro tumalbog. Lahat po ‘yan hawak naman po namin ‘yung ebidensya, ipe-present naming sa court.”
Wala pa sang klaro kun maga-file man sang kaso si Rufa kasunod sini.
Matandaan nga sang Septyembre 2023, nagpaguwa sang Securities and Exchange Commission (SEC) sang advisory natuhoy sa Dermacare-Beyond Skin Care Solutions. Ginpahayag nga indi otorisado ang amo nga kumpaniya nga mag-solicit sang investments bangud indi sila rehistrado kag wala sang lisensya nga magbaligya sang securities.
Sa amo nga advisory sang ahensya, ginsiling nga pwede makasuhan pati ang salesmen, brokers, dealers, agents, promoters, influencers, kag endorsers sang Dermacare.
Sang nagligad nga semana, gindakop man si Neri bangud sa amo man nga violation sa Securities Regulation Code, apang wala ini nakaguwa tubtub subong, bangud nangatubang man ini sang syndicated estafa case nga wala sang piyansa. #
