ILOILO CITY- Kaangay nga nagmag-an na ang ginabatyag nga kalisod kag kaakig sang pamilya sang lalaki nga ginbawian sang kabuhi matapos nga ginbungguan sang driver sang sports car sa Pandac, Pavia.
Ini matapos nga napasaka na ang kaso nga murder, frustrated murder, kag malicious mischief batok sa driver sang BMW nga si Rudolph dela Rosa.
Sa interview sang Bombo Radyo kay Mr. Robert Garcia, amay ni Rave Garcia, iya ginpahayag nga bisan paano, nalipay sila sa development sang kaso.
Matandaan nga magluwas kay Rave, pilason man ang asawa sini nga si Shefryl, 23, sa amo nga insidente.
Base sa imbestigasyon, halin ang mag-asawa sa Mandurriao kag pakadto sa Brgy. Balabag,Pavia sakay sa ila nga mountain bike sang hungod nga gindalasa sang salakyan.
Sa subong, nagapabilin naman sa ospital ang asawa sang napatay.
