ILOILO CITY – Nagakahangawa ang Sangguniang Panlalawigan sa epekto sa halit sa palangabuhian sang mga pumuluyo kasunod sang nagluntad nga oil spill sa baybayon sang Iloilo matapos naglupok ang power barge sang AC Energy.
Sa exclusive interview sang Bombo Radyo kay Iloilo 4th District Board Member Rolando Distura, iya ginpahayag nga naghimo siya sang resolusyon agud makapangayo sang kopya sang resulta kag findings sa ginapatigayon nga imbestigasyon sang Iloilo City Council kag sang iban pa nga ahensya sang gobyerno sa nagluntad nga oil spill.
Suno kay Distura sa banwa pa lang sang Dumangas, Iloilo may yara sang, oyster farm, bangus hatchery, 4,000 ka mga fish ponds kag pito ka mga suba nga nagakonekta sa Iloilo Strait.
Magluwas sini, may yara man sang 14 ka ektarya nga research station ang Southeast Asian Fisheries Development Center (SEAFDEC) sa nasambit nga banwa.
Nagpanawagan man si Distura sa publiko nga kun mahimo magdonar sang lukay sang lubi, uhot, kayan sang mais kag floating material kaangay sang kawayan nga magaserbe nga absorbent sang nagtagas nga bunker fuel.
