Nagsaka na sa 217 ang kabilugan nga numero sang mga nagpositibo sa Coronavirus Disease sa Pilipinas.
Ini matapos nga ginkumpirma sang Department of Health ang 15 ka bag-o nga nagpositibo sa nasambit nga balatian.
Samtang,may yara na naman nga nag-ayo nagikan sa COVID-19 sa Pilipinas.
Ini amo si PH20 nga isa ka 48-anyos nga seaman nagikan sa Cavite kag may yara sang travel history sa Japan.
Siya man ang ika-walo nga pasyente nga narecober sa COVID-19.
Base sa data sang Health department, na-admit ang nasambit nga pasyente sang Marso 7 sa Research Institute for Tropical Medicine, Muntinlupa kag nag-test nga positive sang Marso 9.
Na-discharge siya matapos nga duha ka bes nga nag-test nga negative sa nasambit nga balatian.
Gin-athag naman sang Department of Health ang impormasyon may kaangtanan kay PH57 nga ika-16 nga death case sa COVID-19 sa Pilipinas.
Matapos ang ginpatigayon nga validation sang ahensya sa case investigation form sang nasambit nga pasyente, naggwa nga nagikan sya sa Bulacan kag indi sa Pasig.
Sa subong wala pa sang bag-o nga nga kaso sang napatay sa COVID-19 sa pungsod kag nagapabilin nga 17 ang total death case.
