“Ang daming haka-haka.Ang daming fake news. Walang sacred cows sa PhilHealth. Dapat sinisigurado na ang pera ng mamamayan galing sa ating membership contribution, galing sa ating buwis, sa syntaxes, at sa subsidy ng gobyerno ay dapat proteksyonan at ginagastos lamang para sa dapat tulungan.”
Ini ang pahayag ni Senador Risa Hontiveros, anay myembro sang Board of Directors sang Philippine Health Insurance Corporation (PhilHealth).
Gintawag ni Hontiveros nga fake news ang mga pahayag nga isa man siya sa dapat basulon sa nagakatabo nga lapnagon nga korapsyon sa sulod sang ahensya.
Kun basehan ang pahayag sang Presidential Anti-Corruption Commission (PACC), naglab-ot sa P153 billion ang nadula sa nasambit nga state-run health insurer halin sang 2013 bangud sang korapsyon. Ini ang 30% sang total claims payment nga P512.6 billion nga makolekta sang PhilHealth kada tuig.
Sa exclusive interview sang Bombo Radyo Iloilo kay Hontiveros, iya ginpahayag nga padayunon pa sang Senado ang pagpangusisa agud mabusisi ang tanan nga iregularidad sa ahensya.
Sa pamangkot kun ngaa masami exposed ang ahensya sa pagpangawat, ginpahayag ni Hontiveros nga tuman ka daku ang pondo sang ahensya rason nga nagadaku man ang temtasyon para sa mga opisyal. Ang pondo ang nagikan sa annual subsidy nga ginahatag sang gobyerno, membership contribution, kag revenues halin sa syntaxes.
PLANO NGA DUGANGAN ANG PONDO SA 2021
Ginaduso man subong sa Kongreso nga mahatagan sang dugang nga pondo ang ahensya sa idalom sang 2021 budget agud malikawan ang pagkaputo.
Ini ang kasunod sang pahayag ni Nerissa Santiago, acting senior vice president for actuarial services sa PhilHealth, nga posible maubusan sang pondo ang ahensya sa 2022 bangud sang projected massive losses sa 2020 kag 2021 nga may kaangtanan man sa COVID-19 pandemic.
Apang pahayag sang senador, importante nga mapasabat anay sa layi kag mahibaluan kun sin-o ang yara sa likod sang madugay na kag lapnagon nga korapsyon.
MAY MAFIA BALA SA SULOD SANG PHILHEALTH?
Indi pa man matumod ni Hontiveros kun may yara sang mafia sa sulod sang ahensya.
Una naman nga ginpanginwala sang PhilHealth chief nga si Ricardo Morales nga siya ang toddler ukon protektor sang ginapahayag “sindikato” nga grupo sa talatapan.
Sa bahin ni Hontiveros, iya ginaduso sa Department of Health (DOH), Department of Trade and Industry (DTI), kag PhilHealth ang pagtukod sang Independent Price Negotiation Board (IPNB).
Suno kay Hontiveros, paagi sa IPNB, ma-monitor sang maayo ang presyo sang face masks kag personal protective equipment (PPE) kag malikawana ang overspending, over-reimbursing, kag over-funding sang PhilHealth.
Nahibaluan nga base sa PACC, lakip sa klase sang korapsyon sa Philhealth amo ang mga masunod: ghost memberships, irregulations (sic) sa pagpatigayon sang proceedings, fast-tracking sang claims, procurement sang IT projects (fraud sang mga empleyado), upcasing, non-admitted patients, recruitment, over-bed capacity, kag multiple claims.
